Die Alti Märtplatz – ooni Grytte! – pfläggt d Fasnacht wie in alte Zyte. By uns wird d Draditioon grooss gschriibe: Dr «Sound» isch Fasnachts-typisch bliibe. Doch d Qualiteet vom Spiil vo alte Getti isch die, wo mängge Stammverain gäärn wetti. Au s Goschdym duet by uns aarg zelle (Abfallsegg sinn nur zem Uusestelle). Als Sujets hämmer Hammer-Hits! Au luschtig mien si syy, e bitz! Mir leege Wäärt uff e Ladäärne, woo s Ufnää kaa mit Moond und Stäärne. Mir bringe Zeedel, wo aarg bysse und ihri Zyylschybe gaischtig verrysse! Fir uns isch d Fasnacht no s Ventyyl zem Dampf abbloo wie allewyyl! Isch s au Dy Zyl, bisch iber vierzig und hesch Mumm, denn mäld dy eifach aa, und saag: I kumm!